你今日睇咗《末世凶煞》( Cloverfield )未呀？雖然「搖晃度達尼克特制6級」嘅畫面可能令部分觀眾感到不適，不過都值得入場觀看——只要記得之前千祈唔好食嘢。
睇完覺唔覺個故事好似未完？Bingo，導演 Matt Reeves 話佢哋籌備緊《末世凶煞2》！
《末世凶煞》導演 Matt Reeves 接受 Bloody Disgusting 訪問時透露：「睇情況啦，但我哋已經開始討論拍攝續集嘅可能性及方向。紐約嗰晚可能唔係得佢哋影低咗災難發生經過，或者會有另外一套《末世凶煞》。今時今日好多人用手提電話或者攝錄機記錄佢哋嘅日常生活，然後 upload 去 Youtube…透過呢個角度去考慮都覺得幾 exciting。」
美國開畫周末票房過4000萬嘅《末世凶煞》拍續集都唔算出人意料，但續集未必好似首作咁有懸疑性同埋新鮮感。講番另外一 team 人嘅逃亡經歷好似又新意欠奉嚄！
最尾提醒準備入場嘅觀眾，假若你可以撐足全場，務必密切留意最尾嗰個畫面，另外片尾字幕後邊仲有段錄音——雖然對劇情理解幫助不大。
Tags: Cloverfield, Matt Reeves, Paramount
溫馨提示:
跌落海舊野,唔係隻怪獸
其實係衛星黎
Left by 無 on January 23rd, 2008