迪士尼及彼思動畫工作室今個月9號正式公佈2008年-2012年動畫發行計劃，其中大部分更鐵定喺戲院上映3D立體版！睇吓有冇你心水之選？
Pixar's Wall-E 太空奇兵．威E - 2008年6月27日（美國）/ 2008年7月24日（香港）
導演：Andrew Stanton（《海底奇兵》《蟲蟲特工隊》）
身為最後一名「廢物整理機械人」（地球型號）的威E，在全人類大遷徙後的污染地球上，獨自執垃圾執足700年，一直盡忠職守從未詐病吞pop，當他以為自己要做到down機才可以榮休之時，卻遇上總部派出的最新型號超級機械人Eve，更因而發現自己原來身懷影響宇宙存亡的重大任務，立即緊隨Eve向太空出發！
Bolt 超級零零狗（3D立體版）- 2008年11月26日（美國）/ 2009年1月22日（香港）
導演：Chris Williams, Byron Howard
儆惡懲奸、維持正義的超級零零狗 Bolt（尊特拉華達 配音），大聲一吠令地動山搖、眼中怒火令壞蛋燒焦――這些全都是電視劇中的情節，在鏡頭以外，超級零零狗 Bolt 便變回一隻平凡小狗。一次意外，Bolt 由荷里活片場被送到千里之外的紐約，最弊的是 Bolt 原來一直以為自己真的擁有超乎常人的力量，決定展開一場驚天動地的正義之旅！為了直擊邪惡核心，他先捉了大壞蛋「碧眼狐佬」的得力助手衰貓 Mittens（衰，只是劇情需要），再認識了一隻電視撈飯、經常幻想勇闖龍潭的倉鼠 Rhino，展開一次撞板多過食飯、做英雄慘過做壞蛋的爆笑大冒險！
Pixar's Up 沖天救兵（3D立體版）- 2009年5月29日（美國）/ 2009年7月30日（香港）
導演：Pete Docter（《怪獸公司》）, Bob Peterson
為了遵守一個承諾，實現一個70年的夢想，卡叔用成千上萬個彩色氣球，把他的安樂窩升上天空，即使要歷盡艱險，都誓要直飛南美找到傳說中的「仙境瀑布」。誰知這個旅程加入了活力充沛、最愛整古做怪的8歲童軍小飛，將卡叔平靜的生活一百八十度大反轉！二人要面對逼到埋身的暴雨狂風、發現傳說中的珍禽異雀和識講多國語言的狗仔，仲要高空決戰神秘梟雄…總之今次卡叔同小飛要拍住上勇闖重重難關，齊齊展開一個超緊張勁刺激的飛天之旅！
The Princess and the Frog 公主與青蛙 - 2009年12月11日（美國）/ 2010年2月11日（香港）
導演：John Musker（《小魚仙》《阿拉丁》《大力士》）, Ron Clements（《小魚仙》《阿拉丁》《大力士》）
時隔N年，迪士尼經典歌舞動畫再度回歸！故事背景設定喺美國新奧爾良，主角係迪士尼第一位黑人公主——Princess Tiana。奧斯卡金像獎得主 Randy Newman 為呢個動人愛情故事擔綱作曲，入邊有青蛙、巫毒術同埋一隻識唱歌嘅鱷魚。
Pixar's Toy Story 3（3D立體版）- 2010年6月18日（美國）/ 2010年7月15日（香港）
導演：Lee Unkrich（《反斗奇兵2》《海底奇兵》）
彼思經典動畫《反斗奇兵》及續集一經上映即橫掃全球票房，更獲得觀眾影評人一致好評。製作班底今次再度打開玩具盒，帶我哋翻返去牛仔活地、巴斯光年嘅神奇世界。由《陽光小小姐》金像編劇 Michael Arndt 執筆嘅《反斗奇兵3》講述玩具主人就嚟讀大學，一班玩具好友即時面臨遺棄危機，佢哋又點樣去拯救自己嘅命運？
Rapunzel（3D立體版）- 2010年聖誕檔
導演：Glen Keane, Dean Wellins
經典格林童話《長髮姑娘》首次透過3D立體動畫全新演繹。呢個故事會出現高塔、巫婆、英雄，以及一位擁有金色長髮嘅神秘女子，當然仲有冒險、愛情、頭髮……好多好多頭髮。
Pixar's Cars 2（3D立體版）- 2011年暑期檔
導演：Brad Lewis
人生就好似條快車道。「閃電王」麥坤同好友拖車哨牙嘜又返嚟啦！《五星級大鼠》監製 Brad Lewis 執導嘅《反斗車王2》開拍前，麥坤同哨牙嘜都要準備定護照先！因為佢哋即將加足油展開環球極速之旅，遇上更多奇車奇事。想睇真呢個有車講冇人講嘅世界？Go!
Pixar's The Bear and the Bow（3D立體版）- 2011年聖誕檔
導演：Brenda Chapman（《埃及王子》）
彼思首套童話動畫將故事背景設定喺崎嶇而神秘嘅蘇格蘭。刁蠻爆髮公主 Merida （麗絲韋花斯潘 配音）一心想成為神射手，但王后（愛瑪湯遜 配音）並不認同女兒立下嘅「大志」。佢一氣之下唔經大腦作出某D決定，未曾料到父親嘅王國、母親嘅生命因此而陷入險境。Merida 要對抗各種自然力量、黑暗魔法同古代詛咒，先至有可能挽回一切……
Pixar's Newt（3D立體版）- 2011年暑期檔
導演：Gary Rydstrom
世界上只剩低一隻蠑螈公 Newt 及一隻蠑螈乸 Brooke。科學家為咗拯救物種，將呢對孤男寡女「奉旨成婚」，但一公一婆日日似打仗，又點完成傳宗接代嘅神聖任務呢？七度奪得奧斯卡最佳音效剪接並執導彼思動畫短片《Lift》嘅 Gary Rydstrom 透過呢個故事講述一個簡單道理：尋找伴侶冇可能按計劃行事，即使只得一個選擇。畢竟愛情唔係科學。
King of the Elves（3D立體版）- 2012年聖誕檔
導演：Aaron Blaise（《熊之歷險》）, Robert Walker（《熊之歷險》）
傳奇作家 Phillip K. Dick 唯一一部奇幻短篇故事即將被迪士尼搬上大銀幕。 生活喺密西西比三角洲嘅一個普通人，無端端被班猴擒精靈封為新國王。精靈國居民雖然個個純真無邪，但面臨著黑暗勢力嘅步步進逼。人類精靈國王於是踏上一段险象四伏嘅征程，並從中體會到人生嘅真正意義。
A "Cars" sequel is good for Pixar? I don't think so!
Left by Go Speed Go! on April 15th, 2008