第80屆奧斯卡金像獎頒獎禮今日中午正式揭曉最終得獎名單！
高安兄弟又一離奇巨作《2百萬奪命奇案》( No Country For Old Men )包攬「最佳電影」、「最佳導演」、「最佳男配角」、「最佳改編劇本」4項大獎！同獲8項提名嘅《黑金風雲》( There Will Be Blood )攞到「最佳男主角」、「最佳攝影」2個獎。「最佳女主角」、「最佳女配角」由《粉紅色的一生》( La Vie En Rose )瑪莉安歌迪娜( Marion Cotillard )及《敵對同謀》( Michael Clayton )蒂迪絲雲頓( Tilda Swinton )爆冷勝出。《JUNO少女孕記》、《愛．誘．罪》( Atonement )分別獲頒「最佳原創劇本」及「最佳配樂」當安慰獎。
2008年奧斯卡金像獎頒獎禮前一日，第28屆「金草莓獎」都宣佈咗最終得獎名單。「醜聞女王」蓮茜露漢( Lindsay Lohan )主演驚慄片《I Know Who Killed Me》成爲今年大贏家，9項提名連中8元，包攬「最差影片」、「最差導演」等重量級獎項，打破《艷舞女郎》( Showgirls )及《末日反擊戰 》( Battlefield Earth )嘅7項獲獎紀錄，蓮茜露漢個人同時獲封2項「最差女主角」及1項「最差拍檔」。愛迪梅菲( Eddie Murphy )喺《我愛籮霸》( Norbit )一人分演三角，因此破天荒奪得三項演技大獎：「最差男主角」、「最差女配角」、「最差男配角」，續寫「金草莓獎」不敗傳奇！
第80屆奧斯卡金像獎香港時間1月22日晚上正式公佈提名名單！
《黑金風雲》( The Will Be Blood )同《2百萬奪命奇案》( No County For Old Men )分別獲得8項提名，其中包括「最佳電影」、「最佳導演」、「最佳劇本」等重量級獎項，成爲最大贏家。2008年金球獎最佳劇情類影片《愛．誘．罪》( Atonement )雖然都有7項提名，但就係唯一一套冇「最佳導演」提名嘅「最佳電影」——唔夠《潛水鐘與蝴蝶》( The Diving Bell and the Butterfly )爭。相比之下，《敵對同謀》( Michael Clayton )7項提名「含金量」似乎仲高：「最佳電影」、「最佳導演」、「最佳男主角」、「最佳男配角」、「最佳女配角」、「最佳原創劇本」等等。而最後一位入圍「最佳電影」嘅就係4項提名得主《Juno少女孕記》( Juno )，大肚妹「Juno」艾倫伯吉( Ellen Page )都奪得一項「最佳女主角」提名。
今年只有姬蒂白蘭芝( Cate Blanchett )獲「雙料」提名，除咗《傳奇女王伊利沙伯：黃金盛世》( Elizabeth: The Golden Age )嘅「最佳女主角」，仲有女扮男裝演出搖滾巨星傳奇《I’m Not There》嘅「最佳女配角」提名。
由於編劇工會同演員公會集体杯葛，第65屆「金球獎」( Golden Globe Awards )只係舉行咗半個鐘嘅記者招待會，D明星個個喺晒酒店睇電視。
今年「金球獎」最終得獎名單同「頒獎禮」一樣咁「悶」。《愛．誘．罪》( Atonement )擊敗《2百萬奪命奇案》( No Country for Old Men )同埋《黑金風雲》( There Will Be Blood )攞到「最佳劇情類電影」唔算「驚喜」，但三項提名食晒光蛋嘅《Juno少女孕記》就輸得好唔抵咯！雖然《魔街理髮師》( Sweeney Todd )都係齣好戲，但《Juno少女孕記》絕對有實力奪得「最佳音樂/喜劇類電影」！
荷里活外國記者協會( Hollywood Foreign Press Association )本週一正式宣布，由於編劇工會同演員工會嘅聯合抵制，原定於1月13日舉行嘅第65屆「金球獎」( Golden Globe Awards )頒獎禮被迫取消，改為1個鐘嘅電視新聞節目。
Wordpress | Theme Wucoco | CC-by 授權條款
涉及名稱、相片、影片及其他資料均為相關電影公司持有版權之内容。
