小眾電影往往藉參與各大影展獎項提升知名度，同時亦有助於開拓海外市場。奧斯卡金像獎雖風格偏於保守，但其全球宣傳效應仍令不少電影人紛至沓來。今年代表日本角逐最佳外語片的《禮儀師之奏鳴曲》( Departures )獲得提名，相信對票房有一定推動作用，但購入香港發行權的立基電影卻出人意料將映期押後一周，難道另有內情乎？

《禮儀師之奏鳴曲》在日本獲觀眾傳媒一致好評，更錄得逾2億5千萬港元票房數字，雖在蒙特利爾國際電影節奪得最佳影片，但在美國并未引起太多關注。在奧斯卡提名公布前，日本方面已將電影菲林送到機場，準備付運至香港。不料《禮儀師之奏鳴曲》入圍奧斯卡最佳外語片，日本舉國歡騰，電影公司決定重新上映，於是立即追回菲林，通知立基無法提供舊拷貝，只能沖印新版。

一套作買斷發行的外語片，假如出品地區已大規模落畫，本地片商或會購入舊拷貝，以減低發行成本。一項奧斯卡提名令立基增加近一倍預算印製拷貝，未知是否會縮減上映院數了。一年一度電影頒獎禮難免「有人歡喜有人愁」，而今年發愁的恐怕不只是失意者吧。

《禮儀師之奏鳴曲》香港上映日期：2009年3月19日。

舊年十月同環球達成合作意向的夢工場，未度完蜜月即告「分手」，「第三者」亦隨之浮出水面——迪士尼。

環球上星期透過聲明中表示，夢工場一再要求更改合約條款，包括將環球拆賬比例降至8%以下。而夢工場私底下接觸迪士尼，亦令環球大為不滿，於是放棄同夢工場繼續商討代理協議。

迪士尼週一正式宣佈，旗下 Touchstone Pictures 將由2010年起每年發行6套夢工場電影。有報導指，迪士尼將向夢工場提供2.5億美金貸款，並抽取9%至10%票房收入作為發行佣金。

受金融海嘯影響，夢工場無法從合作夥伴 Reliance Big Entertainment 獲得足夠資金重建新公司，因此迫切需要大電影公司的支持。迪士尼由2006年起削減每年新片數目至12套，電影部門業績亦隨之下滑，舊年更在六大荷里活片廠中包尾。代理夢工場或會為迪士尼電影帶來新轉機。

至於夢工場動畫已脫離夢工場獨立上市，同派拉蒙的發行協議亦將持續至2012年。

積怨多年嘅夢工場、派拉蒙週日正式宣告散夥。史提芬史匹堡( Steven Spielberg )、史迪施史尼達( Stacey Snider )將離開派拉蒙，過檔印度 Reliance ADA 出資15億美金組建嘅新夢工場。

根據分手協議，派拉蒙持有夢工場籌備中嘅200套影片製作權。夢工場、派拉蒙將分別負責其中嘅15至20齣，另一方可選擇參與投資發行。史匹堡亦會為派拉蒙監製《變形金剛》( Transformers )電影系列及重拍科幻災難片《When Worlds Collide》。

夢工場暫未宣佈新發行商，但業界普遍認為環球影片勝算較大。

2005年12月，派拉蒙母公司 Viacom 以16億美金收購史匹堡旗下片廠夢工場。之後夢工場接連推出票房巨片，撐起派拉蒙大半業績。但隨即有消息指，夢工場畀派拉蒙睇低一線，合作時有不快。捱足三年，今日總算恢復自由身。

獨立上市嘅夢工場動畫仍將影片交由派拉蒙發行直至2012年尾。

(Photo source: New York Magazine)

News Corporation 旗下兩大企業二十世紀霍士影片、香港星空傳媒尋日宣佈合資組建 Fox STAR Studios，積極參與亞洲電影製作、發行及行銷項目。

新片廠首個分支機構落戶寶萊塢電影工業中心孟買，其後將設立大中華、東南亞分公司。除咗投資傳統寶萊塢影片，仲會拍攝新浪潮及其他印度語言電影。有報道指，印度 Fox STAR Studios 計劃今年發行3部影片，2009年推出10部影片。

Fox STAR Studios 大中華分公司好大機會設番喺香港。其實星空傳媒一早有製作華語電影，但因缺乏全面發展策略，最終只有少數作品得以上畫。星空傳媒旗下龐大片庫亦會為新公司提供重拍版權。

二十世紀霍士影片今年5月宣佈籌組 Fox International Productions，負責喺日本、俄羅斯、德國、印度等主要市場製作或購入當地電影。

新力電影係較早進入亞洲市場嘅荷里活片廠，1999年就喺香港成立哥倫比亞電影製作（亞洲）有限公司，先後參與《臥虎藏龍》、《可可西裏》及周星馳笑片《功夫》、《長江七號》。初期計劃每年發行3至5套華語電影，但事實上未能達到此目標，甚至試過連續幾年冇戲開。現時只有馮德倫導演、陳冠希主演《跳出去》及《功夫》續集兩齣新片。

華納於2004年與中國電影集團、橫店集團合資組建中影華納橫店影視，但票房業績未如理想，加上與母公司關係緊張，近期難有突出表現。華特迪士尼舊年推出首部華語電影《魔法小葫蘆》，次作《熊貓回家路》亦鐵定於明年上映，另外仲攜手印度電影公司 Yash Raj Films 每年製作一套動畫長片。

香港首間 IMAX 商業戲院落戶九龍灣 MegaBox，舊年《哈利波特—鳳凰會的密令》到今年《蝙蝠俠—黑夜之神》，入座率一直不俗，但商場位置交通不便對客源亦有一定影響。為拓展本地市場，IMAX 及 UA 院線週一宣佈喺尖沙咀港鐵站上蓋 iSquare 開第二間 IMAX 影院。

30層國際廣場 iSquare 位於尖沙咀彌敦道凱悅酒店舊址，耗資逾5000萬港元嘅 UA 戲院設有2間標準影院、2間貴賓影院及1間470座 IMAX 影院，共提供逾900個座位，預計2009年底隨商場落成開幕。

新IMAX影院銀幕增至40呎高、70呎闊，但仍低於標準尺寸（53呎高、72呎闊）。IMAX MegaBox 部分座位因角度問題無法觀看3D影片，相信「度身訂做」嘅 iSquare 戲院會有所改善。

最受關注當然就係首次引進嘅 IMAX 數碼投影系統，除咗提升畫面質素，仲可以透過衛星直播演出或賽事。設備升級亦大大減低影片發行成本，現時一個70mm菲林拷貝花費逾17萬，但數碼放映使用硬碟儲存影片，僅需7萬。

IMAX 表示，香港未來仲會新開2至3間 IMAX 影院。

上個星期有報道指，成立於2001年嘅華納影視香港分公司正式宣佈結業，而本地影碟發行業務就轉手得利。發行權變更喺業界並非罕事，不過好多人都關心得利今次是否會為華納帶來「新氣象」？

香港華納影視執笠未必因業績欠佳，而係因為香港市場空間有限，特設分公司要承擔較高營運開支，而華納影視喺香港只發行自家影片，的確難有作為。

其實華納影視近幾年一直有結業傳聞，不過最終揀喺今年放盤，可能因《蝙蝠俠—黑夜之神》( The Dark Knight )票房表現強勁刺激市價上揚，高位抛售又可以慳多筆，一舉兩得。

華納即使交由得利代理，發行計劃仍由華納影視制訂，而影碟又因香港、台灣、泰國等東南亞市場共版而統一喺台灣製作。得利基本上只負責賣碟，建議各位對字幕版本唔好期望太高……

對於多數消費者，恐怕惟一可見變化就係華納影碟包裝標籤變咗「發行：得利影視股份有限公司」。

時代華納尋日正式宣佈將 New Line Cinema 併入華納影片，宣告 New Line Cinema 結束40年獨立運作時期。

拍喜劇、恐怖片、黑人電影出名嘅 New Line Cinema 作為華納旗下機構，將會繼續製作發行新片，但公司規模面臨大幅縮減，預計有600名員工受到影響。New Line Cinema 創始人 Bob Shaye 及 Michael Lynne 已經請辭，製作總監 Toby Emmerich 暫時未宣佈去留。

另外，New Line Cinema 併入華納影片后，將不再售出海外發行權，而係交畀華納影片國際發行部門。相信有助於 New Line Cinema 開拓海外電影市場及數碼發行業務。

時代華納表示，今次公司重組決策係基於節省開支預算、提升商業回報嘅考慮。合併後每年運作經費預計減少5000萬美金。

啱啱奪得北美周末票房冠軍嘅《Semi-Pro》係 New Line Cinema 最後一套獨立發行製作，之後將由華納影片全面接手，包括有《今晚好搞嘢2》( Harold & Kumar Escape from Guantanamo Bay )、《色慾都市》大電影( Sex and the City: The Movie )、《He's Just Not That Into You》、《Journey to the Center of the Earth 3D》，當然，仲有萬眾期待嘅兩集《魔戒前傳：哈比人歷險記》( The Hobbit )。

環球影片正式宣佈麥迪文( Matt Damon )及保羅格連加斯( Paul Greengrass )將再度合作《叛諜追擊》系列第四集！

三集《叛諜追擊》全球票房已累積超過9億4500萬美金，最新一集《叛諜追擊3：最後通緝》( The Bourne Ultimatum )更收得4億4300萬美金。麥迪文早前公開宣佈不再演出續集，但隨後改口話只要《叛諜追擊》第2、3集導演保羅格連加斯繼續執導，佢就接拍第四集。而保羅格連加斯又表示，麥迪文唔接，佢就唔拍。《叛諜追擊》系列咁賣座，環球影片都應該請晒佢哋番嚟啦！

《叛諜追擊》三部曲係根據2001年過世嘅 Robert Ludlum 同名小說改編。Eric Van Lustbader 隨後寫咗兩部續作：The Bourne Legacy (2004)及The Bourne Betrayal (2007)，但反響平平。環球影片或者會考慮重新創作續集故事。

近年商業表現欠佳嘅環球影片正籌劃多部矚目之作，尋求票房突破。除咗《叛諜追擊4》，環球仲夥拍《魔間迷宮》( Pan's Labyrinth )導演吉拿域戴拖路( Guillermo del Toro )製作《天魔特攻2》( Hellboy II )及 H.P. Lovecraft 名作《At the Mountains of Madness》。「波叔」沙格畢朗高漢( Sacha Baron Cohen )又一「搞」作《Bruno》都係由環球發行。史提芬史匹堡旗下片廠夢工場同派拉蒙合約今年到期，環球都希望力邀夢工場加盟以擴大片源。

華納影視1月4日忽然放棄 HD DVD，力撐 Blu-ray Disc，但 HD DVD 發行計劃仍將持續至今年5月尾。這是派拉蒙轉投 HD DVD 後，影響高清影碟市場的又一重大事件。

華納表示，HD DVD 同 Blu-ray 長期「混戰」令到消費者無所適從，而錯過發展高清影碟市場的最佳時機。因此他們決定表明立場：「Only Blu-ray!」

同為時代華納旗下的 New Line Cinema 亦跟隨華納，僅發行 Blu-ray Disc 高清影碟。

東芝 HD DVD 陣營隨後發表聲明：「身為DVD論壇核心成員，我們與華納一直保持良好關係，DVD標準化階段就已開始緊密合作... 我們對於對於華納的決定表示失望。HD DVD 的高性价比在全球多個市場均獲得消費者認同。2007年支援 HD DVD 的影碟機及電腦在美國的銷量已超過 Blu-ray Disc... 我們相信，HD DVD 是消費者希望而需要的高清影碟制式。」

早前各大美國電影公司，只有華納同時發行 HD DVD 及 Blu-ray Disc。現支援 Blu-ray Disc 的荷里活片廠有4間（新力、華納、霍士、迪士尼），支援 HD DVD 就減少至2間（環球、派拉蒙）。

HD DVD官方宣傳網站：http://www.hddvdprg.com/
Blu-ray官方宣傳網站： http://www.blu-raydisc.com/

《紐約時報》( New York Times )消息，夢工場( Dreamworks )高層正係度同NBC環球( Universal )傾緊真人影片發行合作，而夢工場同派拉蒙( Paramount )嘅合約將會喺2008年年底終止。

報道指出，夢工場嘅合夥創始人大衛格芬( David Geffen )去年暑期就開始同NBC環球接觸，尋求對方提供不少於派拉蒙影片當前嘅4億美金財政支援——派拉蒙2005年底已經一次過支付畀夢工場16億美金。

從去年開始，夢工場總裁大衛格芬、史提芬史匹堡( Steven Spielberg )、CEO史迪施史尼達( Stacey Snider )同派拉蒙關係不和就已經成為公開嘅事實，特別係夢工場製作《變形金剛》( Transformers )等賣座影片向派拉蒙貢獻咗大量票房收入之後。

《紐約時報》同時指出，夢工場同NBC環球嘅合作前景也並不明朗，主要是因為格芬開出嘅價位不低，而且夢工場仲大開獅口尋求外部財政支援。

呢個消息對派拉蒙可能是一個沉重嘅打擊，因為佢哋今年發行嘅賣座影片基本上都是出自夢工場。一旦同夢工場分手，必然會面對巨大嘅收益壓力。何況同夢工場動畫製作公司嘅發行合約都會喺2012年底終止，對方是否會考慮轉投NBC環球夢工場也實屬未知數。而業績低迷嘅環球影片能否藉夢工場重振雄風？我哋拭目以待。

新力影片( Sony Pictures Entertainment )製作《天使與魔鬼》( Angels & Demons )不幸成為首個受到美國編劇罷工影響而推遲上畫嘅荷里活大製作。

同2006年劣評如潮不過都幾賣得嘅《達文西密碼》( The Da Vinci Code )一樣，前傳《天使與魔鬼》都係由朗侯活( Ron Howard )執導，湯漢斯( Tom Hanks )主演。之前有報道話，編劇阿基華高士文( Akiva Goldsman )快馬加鞭喺編劇工會罷工之前趕晒劇本，不過而家睇嚟都係出咗問題。何況出片除咗湯漢斯之外，其他角色仲未有著落。

所以新力上周五宣佈《天使與魔鬼》將推遲上畫，從2008年12月推到2009年暑期。原定于明年2月嘅開拍日期估都要TBA了。

新力影片發言人透露，佢哋同製作單位都覺得個劇本幾唔錯，不過佢哋就擔心拍攝期間可能需要調整劇本而搵唔到編劇，考慮到保證影片質素先至做出呢個決定。

新力表示，《天使與魔鬼》新嘅上畫日期係2009年5月15號，而且佢哋唔希望新力2008年發行嘅其他影片都會受到罷工的影響。

美國編劇工會嘅罷工目前已經進行咗12日。就係今日，電影電視製作人聯合會同埋編劇工會聯合發表聯合聲明，表示佢哋將於11月26號恢復雙方談判。稍後編劇工會西部主席 Patric Verrone 發送電郵畀所有成員，讚揚佢哋呢幾日嘅罷工行為。佢話，罷工越徹底，罷工持續嘅時間就越短。雖然恢復談判係一個好消息（說明佢哋嘅行動終於有所成效），不過「罷工尚未成功，編劇仍需努力」，罷工最終嘅目的就係要換到一紙公平嘅合約。